OʼZ  ЎЗ  РУ  EN

Xadicha Ro'zmetova

Qoraqalpog‘iston Respublikasidan

DUNYO

Hayot go`yo daryo, goh tinch, goh toshqin,
Yuksak parvoz uchun yozib qulochin,
Inson tog`u toshga uradi boshin,
Orzusi yo`lida misoli lochin.

Hayot go`yo daryo, mudom shiddatkor,
To'lqinlari ortga qaytmagay takror.
Unda qanday "suzish" o`zingga bog`liq,
Bosgan qadamingning bari o`lchog`liq.

Yaxshi ham,yomon ham o`tadi undan,
Unumli foydalan vaqtdan ham kundan.
Yaxshi insonlardan yaxshi nom qolur,
Yaxshilik - hech qachon so`nmaydigan nur.

Dunyoda yaxshilik qolguvsi abad,
Shu bois yaxshilik qilaylik faqat.

VATANIM

Ona-Vatan - bag`ri keng mardlar maydoni,
Uni asrar, qo`riqlar Vatan o`g`loni.
Har bir qarich tuprog`i jonga barobar,
Hech kimsaga bermaymiz, bahosi yo`q zar.

Bobolarning qonlari oqmoqda qonda,
Vatanimiz dovruqli bo`lur jahonda.
Vatan deya o`tgandir ne-ne botirlar,
Vatan ular nomlarin doim xotirlar.

Ey,Vatanim, ulg`ayib qizing bo`laman,
Ehtimol, tilingdagi so`zing bo`laman.

QUYOSHLI YURT INSONLARI

Nimasi bor demagin, o`zbekning g`ururi bor,
Egnidagi choponin o`zgacha sururi bor.
Boshida bor do`ppisi - hayotning naq ramzidir,
Elda yurgani davlat, baxti - o`gil-qizidir.

Dalalari durga teng, boyliklari behisob,
O`ylagani dunyoda ezgulik hamda savob.

Uning yana nesi bor? Va`daga vafosi bor,
Vatanga sadoqati, mardligi, navosi bor.
Daryolari, qirlari, vodiy, tog`-toshlari bor,
Havas qilsa arzirlik bilmdon yoshlari bor.

LOLAQIZG`ALDOG`IM

Ko`zidan uyquni quvgan,
Shabnamlarga yuzin yuvgan,
Alvon yuzli gul-yaproqsan,
Qizg`aldoqsan, qizg`aldoqsan.

Mening jajji qizg`aldog`im,
Sen borsanki, atrof yashnar.
Beg`ubordir tabassuming -
Meni shodliklarga boshlar.

Mening jajji qizg`aldog`im,
Kulib turgan gulbaldog`im,
Uzmoqqa hech ko`zim qiymas,
Seni ko`rmasam ham bo`lmas.

Go`zalikka bo`lib haykal,
Mayin yelda asta chayqal,
Nozikkina qizg`aldog`im,
Dilga oziq gulbaldog`im.

NAVRO`Z

Gul tergani dalalarga chopamiz,
Buvim bilan yalpiz somsa yopamiz.
Qozonlarda sumalaklar qaynaydi,
Yigit-qizlar davra olib o`ynaydi.

Navro`z keldi,
Navro`z keldi o`lkamga.
Bobodehqon,
Peshvoz chiq-ey ko`klamga.
Dalalarda ish qiziyd kechgacha,
Navbahorning zavqi-shavqi o`zgacha.

Seni ko`pdan sog`ingandik, Navro`zim,
Hammadan ko`p sog`ingan bu-men o`zim.

ONAJONIM

Onajonim, mehribonim,
Jonajonoim,gulruxsorim,
Yo`lingizga gullar to`shay,
Onajonim, jonda borim.

Onajonim, mehribonim,
Yurganida bizni degan.
Farzand,deya yonib kuygan,
Har dam o`g`il-qizim degan.

Ollohimdan tilagani -
Bolalarga baxt,omonlik
Va doimo o`ylagani -
El-yurt uchun farovonlik.

ATLAS

O`zbek kiyimi atlas,
Unga barovar adras.
Gar undan kiysang ko`ylak,
O`zbeklikdan bu darak.

Marg`ilondir vatani,
Marg`ilonliklar shani.
To`qishning bor sirini,
Bilar Marg`ilon kelini.

Marg`ilonga borsang, bas
Kiyib qaytasan atlas.
Yigitlarga belbog`adras,
Hamma ham qilar havas.

Yetti rangli kamalak
Atlasdan rang olgandek.
Atlas kiyib hur-malak
Yurtimda mangu qolgandek!

70 YOSHING MUBORAK, NUKUS!

Bag`ri keng, qalbi daryo Qoraqalpoqsan,
So`z sehrida bulbulgo`yo Qoraqalpoqsan.
Tuprog`ing zar, bobodehqon Qoraqalpoqsan.
Matonatda misli mezon Qoraqalpoqsan.

Aziz shul o`lkamning bosh shahri Nukus,
Yetmish yoshing yubileyi - bu elda nufuz.
Xalqlarning do`stligi senda mujassam,
Do`stlik guli bilan hayot ham ko`rkam.

Jayhunning bo`yida chinordek o`sding,
To`yingga kelmishdur barcha yor-do`sting.
Berdaq, Ajiniyoz - buyuk shoirlar
Sherlari yangraydi,xalqim xotirlar.

Sulton Uvays bobo, Norimjon bobo
Ruhlari qo`llagay seni doimo.
Amu yoqasida katta shodiyona-
Bugun Nukus shahri masli to`yxona.

Yetmish yoshing qutlug` bo`lsin! Yashnayver!
Istiqlol yo`lidan qadam tashlayver!

Saytimiz rivojiga hissa

Uzcard: 8600 5504 8563 9786

© 2004-2020 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.