background
logotype

Roberto Karlos: Braziliyalik «zambarak»

 Raqiblar darvozasi tomon jarima to‘pi belgilangan. Darvozagacha 30 metrlar masofa bor. Bu yaqin masofa emas. Lekin darvozabon qattiq xavotirda. «Jonli devor»dagi futbolchilarning ko‘zlarida esa allaqanday hadik... Qo‘rquv... Hayajon... negaki, to‘pning oldida unga zarba berishga shay turgan Roberto Karlos turibdi! 

Ma’lumot uchun
To‘liq ismi: Roberto Karlos da Silva.
Ampluasi: himoyachi, yarim himoyachi va hujumchi.
Terma jamoasi: Braziliya. 
Klubi: «Real» (Madrid, Ispaniya)
Tug‘ilgan yili va sanasi: 1973 yil 10 aprel. 
Bo‘yi: 168 sm. Vazni: 79 kg.
Sovrinlari: jahon chempioni — 2002, jahon vitse-chempioni —1998. Amerika kubogi sohibi 1997, 1999. Olimpiya o‘yinlari bronza medali sohibi — 1996. Ispaniya chempioni 1997, 2001, 2003. Chempionlar Ligasi g‘olibi 1998, 2000, 2002, «Toyota» kubogi sohibi  1998, 2002. UEFA  Superkubogi sohibi 2002.

Bu nomni eshitmagan, bilmagan futbol muxlisining o‘zi yo‘q  bo‘lsa kerak. Roberto Karlos deganda uning do‘sti Ronaldoning ta’biricha, «har qanday futbol  uchrashuvini shouga aylantira oladigan», bizningcha esa zamonaviy futbolchi uchun kerak bo‘lgan barcha jihatlarni (tezlik, jismoniy tayyorgarlik, texnika, maydonni ko‘ra olish, atletizm) o‘zida mujassamlashtirgan, kichik jussali  bo‘lishiga qaramay maydonda katta ishni o‘z bo‘yniga oladigan «super universal» futbolchini ko‘z oldimizga keltiramiz. Shuningdek, u eng barqaror o‘yin ko‘rsata oladigan kamdan-kam futbol yulduzlari sirasiga kirishini ham aytib o‘tish joiz. Mana, 10 yildirki, qahramonimiz Madridning «Real» jamoasi tarkibidagi eng asosiy futbolchilardan bo‘lib kelmoqda. 

1996  yilgi mavsumda ilk bor «Qirollik klubi» libosini kiygan Roberto Karlos shu paytgacha biron marta ham «ikkinchilar» safiga tushib qolmaganligi uning haqiqiy yulduz ekanligini ko‘rsatib turadi.

Uning kuchli va betakror zarbalari, yuqori tezligi, chiroyli fintlari hamda maydonda tinim bilmay harakatlanishi, shiddatli reydlari oldida ko‘pincha  raqiblari ojiz qoladi. Roberto Karlosga xos bo‘lgan bunday xususiyatlardan ilhomlanib ketgan muxlislari uni bejiz «abadiy jonli dvigatel» deb atamaydilar. Ayrimlar esa uni zambarakka ham qiyoslaydilar. Bu uning kuchli zarba sohibi ekanligiga ishoradir. Erinmagan ba’zi mutaxassislar uning zarbalari tezligini ham bir necha bor hisoblab ko‘rishgan. Natija?  Uning zarbasidan so‘ng darvozaga yo‘naltirilgan to‘pning tezligi soatiga 180 kilometrga yetgani ma’lum!  Yoshi o‘ttizdan oshgan Roberto Karlos hamon o‘sha-o‘sha. 25 yoshida qanday yugurgan bo‘lsa, hozir ham shunday yugura oladi: 100 metr masofani 10,5 sekundda bosib o‘tish unga cho‘t emas!

Ammo bu hammaning ham qo‘lidan keladigan ish emas-da! Bo‘yiga nisbatan vazni ancha og‘ir bo‘lganiga qaramasdan gavdasini to‘g‘ri tutgan holda, joyidan turib 70 santimetrgacha balandlikka sakray olishini eshitib esa hayratdan yoqa ushlaysan kishi (Karlos ijrosidagi bunday holatlarni TV orqali ko‘p ko‘ramiz. Misol uchun o‘tgan yili Yevropa ChL bahslaridagi bir uchrashuvda uning ikki metrli raqibi chex Yan Kollerdan «ikkinchi qavat»dagi kurashda qanday ustun kelganligini eslang). 

Roberto Karlosni boshqa futbol yulduzlaridan ajratib turadigan jihatlari faqat yuqoridagi xislatlari emas. U ajoyib futbolchi bo‘lishi bilan birga ajoyib inson hamdir. O‘qituvchi va sinfdoshlarining ta’kidlashlaricha, u yoshligida a’lochi, odobli, xushmuomala va mehribon bo‘lgan. «Real» ijrosidagi o‘yinlarni TV orqali tomosha qilganimizda, o‘yinchilar bir-birlari bilan janjallashib qolguday bo‘lsalar, darrov Karlos kelib, hammadan avval ularni ajratib qo‘yishiga guvoh bo‘lamiz. Shundan so‘ng esa Roberto hamon yoshligidagi ajoyib fazilatlarini tark etmaganiga ishonch hosil qilamiz.

U Braziliya terma jamoasi  safida ham, «Real» tarkibida ham juda ko‘p sovrinlarni qo‘lga kiritgan. Jamoalarning bunday yutuqlariga u juda katta hissa qo‘shgan. Biroq Roberto Karlos shu paytgacha biron marta «oltin» yoki «brilliant» to‘pni qo‘lga kirita olmadi. Bundan esa uning muxlislari ko‘proq qayg‘uradilar. Ammo, ularni xursand qiladigan, ularga taskin beradigan bir jihat ham bor: Roberto Karlos hamon maydonda!

U chiroyli o‘ynashda davom etayotir!

Elmurod Nishonov

2004-2017 © www.ziyouz.com. Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi.

.