OʼZ  ЎЗ  РУ  EN

Frenk Abiodun Eg-Imukxede (1935)

Frenk Abiodun Eg-Imukxede 1935 yili If shahrida (Nigeriya) tug‘ilgan. Ingliz tilida ijod qiladi.

BIR ERKAKKA BIR AYOL

Cherkovga bormayman, yurmayman mahkamada —
“Yangi madaniyat” mavzusi unda muhokamada,
Unda aytilmoqda “Teng huquqlilik” haqidagi savol
Hamda mag‘rib tiqishtirgan ushbu xom-xayol:
Bir erkakka – bir ayol.

Bilaman, ko‘p xotinli edi otamning otasi,
Tenglikka tupurgandi — hammaning kelardi havasi!
O‘zining uyida xon edi, ko‘lankasi – maydon.
Oqlar keldi, hammasi topdi zavol —
Bir erkakka – bir ayol.

Kerilmasinmi endi uydagi yor, dugona,
Axir, u erida yolg‘iz, yagona?
Bu yoqda oqlar der, tug‘ish – zarar, ey ona,
Buni o‘ylab topdi qay battol —
Bir erkakka – bir ayol.

Bir ayolga qanoat qila olarmi erkak?
Ro‘zg‘or yuritish zarur, dalada ishlash kerak,
Bananni terish lozim, qovurish, bug‘lash kerak,
Buning ustiga yana bola tug‘sin bemalol -
Bir erkakka – bir ayol?!

Deylik, uyni eplamas, istamaydi tug‘moqni,
Kitob o‘qib o‘tirar, xushlamas pishirmoqni;
Qutilmoq mumkinmikan bu taxlit tasqaradan?
Ajralishmi? Bo‘ldi, bas — millatga zavol -
Bir erkakka – bir ayol…

Karim Bahriyev tarjimasi

© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.