OʼZ  ЎЗ  РУ  EN

Paskal Petit

 Paskal Petit Parijda tug‘ilgan, bolalik va yoshlik yillari Fransiyada va Uelsda kechgan. Hozir Londonda yashaydi. Uning uchta to‘plami va ikkita she’riy pamfletlari chop etilgan. 2004 yilda u Kelajak shoirasi deb tan olingan. Uning ikki to‘plami “Hayvonot bog‘i asoschisi” (Seren, 2001), “Ovchi ayol” (Seren, 2005) T.S. Eliot mukofotiga loyiq ko‘rilgan va “Times Literary Supplement” nashrida “Yil kitoblari” deb e’tirof etilgan. “Hayvonot bog‘i asoschisi” Badiiy kengashning Ingliz yozuvchilari mukofotiga , shuningdek, Yangi London yozuvchilari mukofotiga sazovor bo‘lgan.

U ilk marotaba nashr etilgan she’riyat maktabi antologiyasining muharrirlaridan biri hisoblanadi. Royal San’at kollejida haykaltaroshlikdan saboq olgan. Paskal “London poeziyasi”ning muharriri hamda hammuallifi sanaladi va ushbu nashrda 1989 yildan 2005 yilgacha she’riyat bo‘limi muharriri sifatida faoliyat ko‘rsatgan. Uning she’rlari bir necha marta Bi-bi-si radiosining dasturlarida yangragan, Buyuk Britaniya, AQSh va Avstraliyada chop etiladigan Poetry Review, Modern Poetry in Translation, American Poetry Review, Kenyon Review, Poetry Wales va Quadrant kabi ko‘plab jurnallarda e’lon qilingan. 

Uning she’rlari xitoy, litva, fors, portugal, ispan, nemis, dat va rumin tillariga tarjima qilingan. “Hayvonot bog‘i asoschisi” asarining ikki tildagi, ya’ni ispan va ingliz tillaridagi nashri Mexikoda chop etilgan.

She’rlari o‘zbek tiliga ilk bor tarjima qilinmoqda.

QANDIL DARAXTI

Barglar orasinda tosh qotgan ma’vo, 
tikilgum, yuz ochar toza, ko’k patlar,
ko’zimga suratin chizadi havo.

Ko’rgum, odam chiqsa bo’lar joygacha
Tugamas daraxtning tanasi, ammo
Yetib borar joyi bir guli archa

stratosferni yorar samo patlari
havorang o’rmonda inja tolaning
ko’kish, ba’zan esa oq qat-qatlari

hali tun kirguncha sir yaproqlari
birdan bosh ko’tarar yulduzlar bilan –    
ular nur daraxtin miltiroqlari.


QUSHLARNING YARATILISHI

Yulduz nuri bilan qushlar chizgum bot,
Ish qancha qiyindir, shuncha zo’r qanot – 

ularning nuri ham quyoshli, oyli.
G’aroyib tovushli nay bor chiroyli,

g’ijjak cho’tkasidan chizilgan surat,
tanholik onida g’o’ng’irlar faqat.

Qo’yib yuboraman qurimay bari
dilgir va nurlidir ashulalari.

Ko’hna o’rmondagi inlari yolg’iz
daraxtlarimiz-chun vaqtincha og’iz. 

Buyuk ko’chish uchun tayyor turarlar,
Zamin qafasiga o’zni urarlar. 
 
 
ATLAS PARVONA

Atlas parvonaning ochilgan qanoti
Xitoy xaritasi bo’lishi mumkin.

Mana ikkita Buyuk Devor. 
Har bir old qanotdagi Manjuriya uchida

Yirtqichlarni qo’rqitish-chun ajdaho boshi.
Ammo nima ekan hov darichalar 

Kristall donachalarga nur tushgan joyda?
Go’yo zamin qobig’ida darichalar bor

kechqurun ma’lum bir paytlarda ochilar ular.
Yangi paydo bo’lgan atlas 

qo’limda qoladi, birinchi parvoziga isingan holda 
yangi dunyo misol tebranadi u. 

Ingliz tilidan A’zam Obidov va Nodira Abdullaeva tarjimalari
© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.