OʼZ  ЎЗ  РУ  EN

Abdulla Ahmad. To‘y kimniki? (hajviya)

Maslahat yaxshi-da. Nega deysizmi? Obbo, o‘jar odamga o‘xshaysiz-ku! Axir, maslahat xom ishni pishitadi. Kami-ko‘stni to‘ldiradi. Gapning o‘g‘il bolasini aytaymi? Hech kim lo‘nda qilib maslahat berishda To‘zg‘anboyning oldiga tusholmaydi. U shundog‘am foydali maslahatlar beradiki, bitmagan ishingiz bitganday, taqa-taq to‘xtagan yumushingiz yurishganday, chaqasiz qolgan hamyoningiz to‘lganday bo‘ladi.
Hozirgina uyni qandoq qursam ekan, shiferni qaydan olsam ekan deb, xomush bo‘lib turgan odam birdan sherlanib ketasiz. To‘zg‘anboy so‘zlarni chertib-chertib, burro-burro qilib, ishonch bilan maslahat beradi-da. Yelkangizdan tog‘ ag‘darilganday bo‘ladi.
Aytaylik, siz to‘y qilyapsiz. To‘zg‘anboy asta so‘raydi:
— Tashvishlar qiynab qo‘ymadimi, uka?
— Birnavi, qiynalganimcha yo‘q...
— O, shunday deng. Balli, yashang!
— ...
— Xo‘sh, jonim ukam! Oshga qancha guruch damlaysiz?
— Oshgami, hmm... biron o‘ttiz kilo yetib qolar.
— E, e, nimalar deyapsiz? O‘ttiz kilo? Buningiz urvoq ham bo‘lmaydi-ku?! Kattakon jamoada ishlaysiz. Hamkasblar, qarindosh-urug‘ deganday. Hoy og‘ayni, belni mahkam bog‘layvering. Yuz kilodan kami — kam. Qancha odam aytmoqchisiz?
— Yuz kishi atrofida.
— Uff! Hazillashayapsizmi?! Bunaqada menga o‘xshagan baobro‘ hamsoyalarni xafa qilasizu! Yo‘q, yo‘q, sharmanda qilasiz! Bilib qo‘ying, kamida besh yuz kishi chaqirasiz. Axir, kimsan To‘zg‘anboy, el oqsoqolining mahallasida to‘y bo‘layapti-ya! Bizniyam o‘ylang-da!
— Mayli-mayli, o‘ylab ko‘ray-chi.
— Buyog‘i hal. Artistlardan kimni aytdingiz?
— Hali aytganim yo‘q. Ha-ya, anavi bor-ku, musiqa muallimi, yaxshi qo‘shiqchi...
— Be, yig‘ishtiring uni! Ovozi past, Toshkentdan olib kelamiz. Eng mashhurini.
— ...
— Hey, menga qarang. Asosiysi esdan chiqay depti-ya. To‘yni qaerda o‘tkazmoqchisiz?
— O‘zimizning chorbog‘da-da, qurigan daraxtlarni kesib-b...
— Nimalar deyapsiz? Bo‘lmaydi, bilasizmi, kecha narigi mahallada yangi to‘yxona ochildi. Umuman dahshat. Hamma havas qilyapti. To‘yni shu yerda o‘tkazamiz. Do‘stlar suyunib, dushmanlar kuyib o‘lsin.
— Ma’qulmi?
— Bilmadim...
— Ajabo, bu odamni qarang. Bilmadimingiz nimasi? O‘ylab gapiring.
— Ha, endi dangaliga o‘taylik. O‘zi to‘yni kim qilayapti, sizmi, menmi?
— Albatta sizda, ukaginam!
— Shundaymi? Xo‘b, yaxshi maslahat berdingiz, faqat...
— Nima faqat?
— Nima desam ekan...
— Tortinmay aytavering, uka. Mana, yoningizda biz turibmiz, axir.
— To‘yga uch-to‘rt million so‘m qarz berib tursangiz...
— I-i, qiziq odam ekansiz-ku, qarz olib ham to‘y qiladimi? Boring-e, men sizga oson bo‘lsin deb, maslahat berib o‘tiribman-a...

© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.