OʼZ  ЎЗ  РУ  EN

Gulchehra Jamilova. O‘ttiz yil avvalgi gap (hajviya)

Bolta agronomning xo‘p ajoyib bog‘i bor. Xo‘jalikka kelgan mehmon borki, shu bog‘da tunab ketadi. Bir kuni rais bobo bitta xorijlikni agronomikaga boshlab keldi.
— Mehmonni zeriktirmaysiz-da, Boltavoy, — deb tayinladi.
— E, yonida tilmochi yo‘q-ku, qandoq til topishaman?
— Bemalol so‘zlashavering. O‘zbekchani bilarkan, — dedi rais.
Dasturxon ustida suhbat quyuq bo‘ldi. Bir vaqt agronomning ayoli sopol laganda xushbo‘y palov keltirdi. Mehmonga ko‘zi tushgach, odob bilan «Xush kelibsiz!» dedi.
U ketgach, mehmon havaslanib so‘radi:
— Sizlarda uylanish masalalari qanday?
— Bizdami... Biz ayollarni qalin puliga sotib olamiz, — dedi agronom, so‘ng uyi tomonga ishora qildi:
— Mana shu yangangizni ikki ming so‘mga olganman!
Bolta agronomning ta’tilga kelgan talaba o‘g‘li choy opkirayotib otasining gapini eshitib qoldi. Otasiga yer ostidan norozi boqdi. So‘ng mehmonga jilmayib dedi:
— Uzr. Otam o‘ttiz yil oldingi gapni aytayotibdi. Hozir bunday emas.
O‘g‘li nima demoqchi bo‘lganini agronom o‘zicha tushundi. Gap ohangini biroz o‘zgartirib, «xato»sini tuzatgan bo‘ldi:
— Ha, ayollarimiz hozir juda qimmat turadi. O‘zlariyam uncha-muncha pulni nazarlariga ilishmaydi-da!

© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.