OʼZ  ЎЗ  РУ  EN

Hasadgo‘ylik

Bir bor ekan, bir yo‘q ekan, bitta aka-uka bor ekan. Akasi ukasini hech ko‘rolmas ekan. Ikkovlari ham egar yasab sotishar ekan. Akasi kuniga juda ko‘p egar yasar ekan-u, lekin ishlab topgan pulini hech barakasi bo‘lmas ekan. Ukasi esa bir kunda bitta egar yasar ekan-u, lekin o‘ziga to‘q yashar ekan. Bu esa akasiga doim alam qilib kelarkan. Bir kuni u ukasini bir boplamoqchi bo‘libdi.
Ukasi tomga egarlarini yoyib qo‘ysa, u yo‘qligida akasi kelib hamma egarlariga o‘t qo‘yib yuboribdi. Ukasi hayron bo‘libdi-yu, lekin indamabdi. Tomdagi egarlarning kulini yig‘ishtirib, qopga solibdi va bozorga olib boribdi. Bozordagilar uning egar sotishini bilishar ekan. Eshakning ustiga qopni yuklab olgan ekan, bitta xaridor kelib:
— Qopdagi egaringni sotasanmi? — deb so‘rabdi.
— Egarni sotaman-u, lekin qopni yerga qo‘ysam, kul bo‘lib qolsa, xunini to‘laysanmi? — debdi u.
— Darrov kul bo‘lib qolarmidi, yerga qo‘yaver, — debdi xaridor.
— Endi, bilib bo‘lmaydi-da, — debdi va qopni eshakning ustidan olib yerga qo‘yibdi. Ichini ochib qarasa, to‘la kul emish.
— Endi xunini to‘laysan, — deb turib olibdi.
U kishi noiloj pulini to‘lashga majbur bo‘libdi. Kechqurun uyida o‘tirsa, akasi kelib qolibdi. U akasiga kulni ham pulga aylantirib kelganini aytibdi.
Akasi o‘ylab-o‘ylab sigirini o‘ldirmoqchi bo‘libdi. Bir kuni ukasi uyida yo‘qligini poylab borib, sigirini o‘ldirib kelibdi. Ukasi qarasa, sigiri o‘lib yotganmish. Sigirni eshak aravaga solib, bozorga olib boribdi. Dallol:
— Mol necha pul turadi? Pastga tushiring, — debdi.
— Tushirmayman. Tushirsam, o‘lib qolsa, xunini to‘laysizmi? — debdi ukasi.
— Darrov o‘lib qolarmidi, tushiravering, — debdi dallol. U molni aravadan tushiribdi, qarasa, o‘lib yotgan emish.
— Molimning xunini to‘laysan, — deb turib olibdi. Dallol noiloj molning xunini to‘lashga majbur bo‘libdi. O‘sha kuni kechki payt yana akasi kelibdi. U akasiga:
— Mana aka, men baribir bechora bo‘lmayman. O‘lik molni ham pul qilib keldim, — debdi.
Akasi buni ko‘rib hayron bo‘libdi. Shunday qilib, akasi ukasini ko‘rolmay o‘tibdi. Ukasi esa doim o‘ziga to‘q, yaxshi hayot kechiraveribdi.

Saytimiz rivojiga hissa

Uzcard: 8600 5504 8563 9786

© 2004-2020 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.