OʼZ  ЎЗ  РУ  EN

Pavlo Movchan (1939)

* * *

Lahzalarda maydek toshar
telbalanib qon,
lahzalarda dalilligu
uchish va zavol
tayyor turar,
muhabbatdan o‘layotgan on,
yarador qalb bag‘ridagi
hayqiriq misol.
Toshga tekkan
shisha yanglig‘ chil-childir havo —
umid qurar havo qasrin,
havo minorin,
unda ikkov yashash uchun
Sharqu G‘arb aro,
Saharu shom aro,
qilmay ro‘zg‘orning zorin.
Yangrar edi
niliy gumbaz tagida so‘zlar;
yaratganni olqishlardi: berding deb, chidam...
Ammo birdan
chopdi to‘lqin diydorni ko‘zlab,
barin yuvdi:
toshu tomni, bo‘yoqlarni ham.
Siniqlarni artib,
ko‘rdim: yorug‘ga solib —
toshda turib
uchgansan, sen, yulduzlar tomon...
Men qichqirdim,
kimdir yitdi ovozim olib,
go‘yo titrab chinqiriqqa
sanchilgan paykon.
Toshni olib,
otdim sening izingdan, yohu,
ruhim tushib,
taqdirimdan qahrga to‘lib:
so‘qir havo yo‘li bo‘ylab
uchib borar u,
ortda izi cho‘ziladi
qizil ip bo‘lib.

Ruschadan Ergash Muhammad tarjimasi.

© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.