SHOIR TAQDIRI
Shoir Muhammad Yusufni eslab
Olloh dardni berib shoirga
Taqdiriga yozib qo'yarmish:
Qachon dardin she'r qila olsa
Shundagina shoir o'larmish...
Sarosima qilmang shoirlar,
Dardimiz ming yilga yetadi.
Faqat dardin bir baytga bitgan
Muhammadlar o'lib ketadi.
4 sentabr, 2004 yil.
********************
Bog'imga qaytganda sabolar,
Qaytadan yaraldi navolar.
Shabnamga to'yganda havolar
Muhabbat ortiga qaytmadi,
Qayerda qolganin aytmadi...
Kelganda g'uncha deb uzmadim
Yurakning zulfinin buzmadim
Muhabbat ekanin sezmadim
Adashdim. Ketdi-yu, qaytmadi...
Sevgilim ekanin aytmadi...
Zor bo'lib kutganim yetmasdan
O'zgaga parvo ham etmasdan
Ortidan ergashib ketmasdan
Qolgandim. U esa qaytmadi...
"Yur birga ketdik" - deb aytmadi...
Ajib so'qmoqlarda qoqindi yurak
Muhabbat bog'ida yolg'onchi tilak
Bo'lganda men emas, u menga kerak
Muhabbat ortiga qaytmadi.
Qaytsa ham, manzilin aytmadi...
Azimga aylandi nozik bo'y nihol:
Bir umr xijronda to'lg'onib behol,
Bo'lganda dilpora yetishmay visol
Muhabbat ortiga qaytmadi...
Ortiga qaytmasin aytmadi...
14 avgust, 2001 yil
********************
Muhabbatga zorlanadi tashna yuragim,
Topolmayin ishq saxrosi ichra bir buloq.
Sarson yurar visol izlab tunamoq uchun,
Yo'llarida vafo bo'lib yastanar qumloq.
Orzularga zorlanadi xasta bu ko'nglim.
Yor vaslini saroblardan topolmay nochor.
Kunlar quyosh sirdosh bo'lmish armonlariga,
Tunlar dardin xilolaga etadi izxor.
Armonlarga zorlanadi jonsiz vujudim,
Ko'z yoshlari qum bag'riga singmagan daryo.
Tushunmaydi, yolg'izlikdan ko'r bo'lgan qalbim,
Muhabbatning orzulari armonli dunyo.
9-Sentabr, 2003 yil.
********************
Noma yozdim Onajonimga,
Sabolardan yo'lladim, biroq,
Topolmadi borar manzilin,
Yod ayladi uni bo'z tuproq.
Salom yozdim Onajonimga.
Qalbim yarim, armonim butun.
Kunduz mehrim tushgan qog'ozga
Ko'z yoshini artdi qora tun.
Sog'inch yozdim Onajonimga.
Har so'ziga urdi yuragim
To'lmay turib sarg'aydi varaq,
Xazon bo'lib qoldi tilagim.
Armon yozdim Onajonimga.
Yoshim siyox, ko'zim siyoxdon,
Yurak bo'ldi erib bitgan sham,
Qalbim esa qop-qora shamdon.
Dardim yozdim Onajonimga.
Darddan sinib qoldi qalamim,
Satrlarga sig'a olmagan
Shum taqdirda qoldi tilagim.
2003-2004 yillar.
