Tun. O‘n uch yashar dastyor qiz Varka bola yotgan belanchakni tebratadi va eshitilar-eshitilmas ming‘irlaydi.

Alla aytay senga-yo,
Alla qo‘zim, alla-yo...

Sanam oldiga shamchiroq yoqilgan, uyning u burchagidan bu burchagiga tortilgan arg‘amchiga yo‘rgak latta va katta qora shimlar osilgan. Chiroq shu’lasidan shipga katta doira shaklidagi ko‘kimtir dog‘ tushib turipti. Shim va lattalar pechkaga, belanchakka, Varkaga uzun-uzun soya solgan... Chiroq lipillaganda shipdagi dog‘ bilan soyalarga jon kirib, shamoldan silkinayotganday qimirlaydi. Uy dim. Hamma yoqni karam sho‘rva, charm va mum hidi tutib ketgan.
Bola yig‘layapti. U allaqachonlar holdan ketib tovushi bo‘g‘ilib qolgan bo‘lsa ham, big‘illamoqda, hali beri ovunadiganga o‘xshamaydi. Varkani uyqu bosib, ko‘zlari yumilmoqda. Bo‘yni tolib, boshi yerga og‘ib boradi. Na qovog‘ini qimirlata oladi, na lablarini. Nazarida yuzi qovjirab, tarashaday qotgan, boshi to‘g‘nog‘ichning boshiday kichkina bo‘lib qolganga o‘xshaydi.

Alla qo‘zim, alla-yo,
Senga osh pishira-yo...

deb ming‘irlaydi u.
Pechkada chigirtka chirillaydi, narigi uyda xo‘jayini va uning shogirdi Afanasiy hurrak tortadi... Belanchak noliganday g‘ijirlaydi. Varka ming‘irlaydi. Bularning hammasi qo‘shilib allalovchi tun muzikasiga aylanadiki, bu muzikani o‘ringa yotib eshitganda huzur qiladi kishi. Bu muzika Varkaning g‘ashiga tegadi, chunki uyqusini keltiradi, uxlash esa mumkin emas. Xudo ko‘rsatmasin, agar uxlab qolsa bormi, xo‘jayini urib o‘ldiradi.
Chiroq lipillaydi, shipdagi dog‘, soyalarga jon kirib, Varkaning yarim ochiq harakatsiz ko‘ziga suqilganday bo‘ladi... Uning mudrayotgan miyasida alaq-chalaq tushga aylanadi. Varka osmonda bir-birini quvlashib, boladay yig‘layotgan qora bulutlarni ko‘radi. Birdan yel esib, bulutlar g‘oyib bo‘ldi va suyuq loy bilan qoplangan keng tosh yo‘l paydo bo‘ladi, yo‘ldan aravalar o‘tmoqda, uning orqasidan tugun ko‘targan odamlar bormoqda, notayin ko‘lankalar yelib yurmoqda: yo‘lning ikki tomonida sovuq tuman qoplagan o‘rmon zo‘rg‘a ko‘zga chalinadi. Birdan haligi odamlar tugunlari va soyalar bilan o‘zlarini yerga tashlab suyuq loyga yotishadi. — «Nega bunday qildinglar?» — deb so‘raydi Varka. — «Uxlaymiz, uxlaymiz», — deyishadi ular. Mast va shirin uyquga ketishadi. Qarg‘alar, zag‘izg‘onlar telegraf simlariga qo‘nib, xuddi yig‘layotgan boladay qichqirishib, haligilarni uyg‘otishga urinishadi.
— Alla aytay senga-yo, alla qo‘zim alla-yo... — deb ming‘irlaydi Varka va o‘zini qorong‘i, dim uyda ko‘radi. Yerda uning otasi rahmatlik Yefim Stepanov to‘lg‘anayotir, qiz uni ko‘rmaydi-yu, lekin og‘riqqa chidolmay, ag‘nayotganini va ingrashini eshitadi. Unda, uning o‘z ta’biri bilan aytganda «Grija kasali avj qilyapti». Og‘riq shu qadar kuchliki, bir og‘iz so‘z aytishning ilojini qila olmay entikadi, ingraydi.
Onasi Pelageya yugurganicha xo‘jayinning hovlisiga Yefim o‘lay deyapti, deb aytgani ketgan. Uning ketganiga xiyla vaqt bo‘lib qoldi, kela qolsa ham bo‘lar edi. Varka pech ustida uyg‘oq yotib, otasining «oh-vohiga» quloq soladi. Mana, aravada kimningdir kelib to‘xtagani eshitildi, xo‘jayin, uyiga shahardan mehmon bo‘lib kelgan yosh doktorni yuboripti. Doktor uyga kirdi, uni qorong‘ida ko‘rib bo‘lmasa ham yo‘talgani va eshikni yopgani eshitildi.
— Chiroq yoqing, — dedi u.
— Uh-uh-uh, —deb javob qildi Yefim.
Pelageya irg‘ib pechka yoniga kelib gugurt qutisini izlaydi. Bir daqiqa jim qolishdi. Doktor cho‘ntagini kavlab, o‘z gugurtini yoqdi.
— Hozir, taqsir, hozir, — deb Pelageya yugurganicha uydan chiqib ketdi-da, birozdan so‘ng sham qoldig‘ini yondirib kirdi.
Yefimning ikki yuzi yallig‘lab, ko‘zlari yaraqlab turibdi. Ayniqsa ko‘z qarashi shunday o‘tkirki, uyni va doktorni teshib yubormoqchi bo‘lgandek tikiladi.
— Xo‘sh, nima bo‘ldi? — dedi doktor engashib — Ehe! Qachondan beri shunday bo‘lib qoldi?
— Nima dedingiz? O‘lay deyapman, janobi oliylari, kunim bitgan... tuzalmayman...
— Qo‘y, qo‘y bemaza gapingni... davolaymiz!
— Bilganingizni qiling, janobi oliylari, qulluq, faqat biz shuni bilamizki... ajal tikilib kelsa, chora yo‘q.
Doktor chorak soatcha Yefimning u yoq bu yog‘ini ko‘rdi; so‘ng o‘rnidan turib:
— Qo‘limdan hech narsa kelmaydi... Kasalxonaga borishing kerak, u yerda operatsiya qilishadi. Hozirning o‘zida bor... Albatta, bor! Vaqt biroz kech, kasalxonadagilarning hammasi uxlab qolishgandir. Lekin mayli, men to‘rt ellik xat yozib beraman. Uqdingmi?
— Taqsir, nimada boradi? Bizda arava yo‘q, — dedi Pelageya.
— Hech qisi yo‘q, men xo‘jayinlarga aytib ko‘raman, arava berishadi.
Doktor ketdi. Chiroq o‘chib yana haligi «oh-voh...» eshitiladi. Yarim soatdan keyin ko‘cha eshigi oldiga arava yuborishipti, Yefim o‘rnidan turib, kiyinib, kasalxonaga jo‘nadi...
Tong otdi, musaffo ertalabki payt. Pelageya uyida yo‘q; u Yefimning holini bilgani kasalxonaga ketgan. Qaerdadir yig‘layotgan bolaning ovozi keladi. Varkaning qulog‘iga kimningdir uning tovushi bilan bolani allalayotgani eshitiladi.
— Alla qo‘zim alla-yo, alla aytay senga-yo...
Pelageya qaytib keldi; cho‘qindi va pichirlab:
— Kechasi operatsiya qilishgan ekan, ertalab jon beripti... Joyi jannatda bo‘lsin... Kechroq harakat qilibsizlar deyishdi... Ertaroq olib borganda bo‘lar ekan.
Varka o‘rmonga borib o‘sha yerda yig‘lab o‘tirdi, birdan birov uning bo‘yniga shunday musht urdiki, qizning peshonasi borib qayinga tegdi: ko‘zini ochib, oldida xo‘jayini — etikdo‘zni ko‘rdi.
— Bu nimasi, la’nati? — dedi u, — bola yig‘lasin-u, sen uxlagin!
U yaxshilab qizning qulog‘idan cho‘zdi. Qiz boshini silkiganicha beshik tebratib, ming‘irlab allasini aytadi. Shipdagi dog‘ va yoyig‘lik shim, yo‘rgak lattalaridan tushib turgan soyalar tebranib, lipillab yana uning miyasini band qildi, u yana haligi suyuq loy bilan qoplangan yo‘lni ko‘rdi. Tugun ko‘targan odamlar va soyalar yotib, qattiq uyquga ketgan. Ularni ko‘rib Varkaning ham juda uxlagusi keladi. O‘ziga qolsa-ku, jon deb yotardi-ya, lekin onasi Pelageya yonida ketmoqda, u tezroq yur deb shoshirmoqda. Ikkovi ham jadallab shaharga ketishyapti, ishga kirishmoqchi:
— Xudo yo‘liga biroz hayr qilinglar! — deb onasi yo‘lovchilardan sadaqa so‘raydi, — Xudo xayringizni bersin, yaxshilar!
— Ber, bolani bu yoqqa! — deb qichqiradi unga javo-ban tanish bir ovoz, — ber bolani bu yoqqa! — deydi yana haligi ovoz, qattiqroq va jahl bilan, — uxlayapsanmi, kasofat?
Varka cho‘chib ketadi, u yoq bu yog‘iga qaraydi, na tosh yo‘l bor, na Pelageya va na yo‘lovchilar; bolasini emizgani kirgan bekasi uyning o‘rtasida turipti, bu barvasta xotin bolani ovutib, emizib bo‘lguncha Varka kutib turadi. Deraza g‘ira-shira yorishib, shipdagi dog‘ va soyalar xiralashib boradi. Bir ozdan keyin tong otadi.
— Ol! — dedi beka, ko‘ylagining tugmasini sola turib, — yig‘layapti, ko‘z tekkanga o‘xshaydi.
Varka bolani olib, belanchakka yotqizib yana tebratadi. Soyalar, shipdagi dog‘ asta-asta yo‘qoladi va qizning ko‘zini tindirib, miyasini gangitadigan narsa qolmaydi. Lekin hali ham avvalgicha uyqu bosib kelmoqda, hamon uyqusi keladi! Varka boshini belanchakning bir chetiga qo‘yib, uyqusini qochirish uchun butun gavdasi bilan tebranadi. Ko‘zi yumilib, boshi og‘irlashadi.
— Varka, pechkaga olov yoq! — dedi xo‘jayini narigi uydan turib.
Demak o‘rnidan turib, ish boshlaydigan vaqt bo‘lipti. Varka belanchakni qo‘yib o‘tin keltirish uchun saroyga qarab yuguradi. U xursand, chunki yugurib ish qilib yurganda bir joyda o‘tirganday uyqu kelmaydi. U o‘tin keltirib, olov yoqarkan, qotib qolgan yuzlari yumshab, ruhi yengillashganday bo‘ladi.
— Varka, samovar qo‘y! — deb qichqiradi bekasi. Varka tutantiriq qilib to uni yondirib samovarga tashlaguncha bekasi yana:
— Varka, xo‘jayinning kalishini yuvib qo‘y, — deb buyruq beradi.
U yerga o‘tirib, kalishni yuvar ekan, shu katta va chuqur kalishga boshingni tiqib, bir pastgina mizg‘ib olsang qanday yaxshi bo‘lardi, deb o‘ylaydi. Birdan kalish shishib kengayib uyday katta bo‘lib qoldi. Varkaning qo‘lidan cho‘tkasi yerga tushib ketdi. Varka darhol boshini silkib, ko‘z oldidagi narsalar kattalashib, harakatlanmasin deb ko‘zlarini kattaroq ochishga tirishdi.
— Varka, zinani yuvib qo‘y, mijozlar kelsa uyat qiladi.
Varka zinani yuvadi, uylarni yig‘ishtiradi, so‘ng inkinchi pechkani yoqadi va boqqollik do‘koniga qarab yuguradi. Ish ko‘p, biron daqiqa bo‘sh vaqt yo‘q.
Lekin hammasidan ham oshxonadagi katta stol yonida turib bir joydan qimirlamay kartoshka artishdan og‘ir ish yo‘q. Boshi stolga og‘ib boradi, kartoshka jimirlashib, pichoq qo‘ldan tushadi, yenglarini shimargan, semiz, badjahl beka bo‘lsa atrofda shang‘illab yuradi. U shunday qattiq so‘zlaydiki, uning ovozi qulog‘ingda jaranglab turadi. Yana kir yuvish, ish tikish, ovqat vaqtida xizmat qilib turish ham o‘lguday mashaqqat, shunday vaqtlar bo‘ladiki, hech narsaga qaramay polga yotib uxlaging keladi.
Kech kiradi, Varka derazadan qorong‘i tushayotganini ko‘rib, qotib borayotgan chakkalarini ikki qo‘li bilan qisadi va nimaga xursand bo‘layotganini o‘zi ham bilmay kulimsiraydi. Qorong‘i uning mudroq ko‘zlariga xush yoqib, uyqudan darak berayotganday bo‘ladi. Kechqurun uyga mehmon keladi.
— Varka, samovar qo‘y! — deydi bekasi
Samovar kichkina bo‘lganidan mehmonlar choyga qonguncha uni besh marta qaynatishga to‘g‘ri keladi. Choydan keyin Varka soatlab bir joydan qo‘zg‘almay, mehmonlarga qaraydi va xo‘jayinning amrini kutadi.
— Varka, yugur, uch shisha pivo olib kel.
U joyidan sakrab turadi va uyqusini o‘chirish uchun ildamroq yuguradi.
— Varka, bor, araq olib kel! Varka, parma qaerda? Varka, baliqni tozala!
Nihoyat mehmonlar ketishadi, chiroqlarni o‘chirib, xo‘jayinlar yotishadi.
— Varka, bolani tebrat! — degan so‘nggi buyruq eshitiladi.
Pechkada chigirtka chirillaydi; shipdagi dog‘, yoyig‘lik shim va yo‘rgak lattalardan tushib turgan soyalar lip-lip qilib yana Varkaning ochiq ko‘ziga suqiladi, uni gangitadi.
— Alla aytay senga-yo, — deb ming‘illaydi u, — alla qo‘zim alla-yo...
Bola yig‘lay-yig‘lay qotib qoladi. Varka yana haligi katta loy tosh yo‘lni, tugun ko‘targan odamlarni, Pelageyani, otasi Yefimni ko‘radi. U hammani taniydi, hammasini tushunadi-yu, lekin karaxt qilib, uning qo‘l-oyog‘ini bog‘lab qo‘ygan, yashashga monelik qilayotgan bu kuch qanaqa ekanligiga chala uyqu ichida sira tushunolmaydi. U ana shu kuchdan qutulish uchun u yoq bu yog‘iga qaraydi. Lekin uni topolmaydi. U nihoyat charchagan holda o‘zining butun kuchini, sezgisini to‘plab shipdagi lipillayotgan dog‘ga tikiladi va yig‘i ovoziga quloq solib yashashga monelik qilayotgan dushmanni topadi.
U dushman — bola ekan.
Qiz kulib yuboradi, nega shuncha kundan buyon shu arzimagan narsani tushunolmay yurgan ekan? Shipdagi dog‘, soyalar va chigirtka ham hayron bo‘lib unga qo‘shilib, kulayotganday tuyiladi.
Shu xayol Varkani butunlay chulg‘ab oladi, u o‘rnidan turib, iljayganicha ko‘zlarini yummasdan, uyning u boshidan bu boshiga yuradi. Qo‘l-oyog‘iga kishan bo‘lib turgan boladan hozir qutulaman degan xayol uni qitiqlaydi, xursand qiladi. Bolani o‘ldiradi-yu, keyin huzur qilib uxlaydi.
U kulib, ko‘zlarini qisib, shipdagi dog‘ga qarab, barmog‘i bilan tahdid qiladi, asta belanchak yoniga boradi va engashib bolani bo‘g‘adi; keyin darhol polga yotib uxlashning iloji topilganidan behad sevinadi va bir daqiqadan so‘ng o‘likday uxlab qoladi.

Zumrad tarjimasi