OʼZ  ЎЗ  РУ  EN

Bayram At-Tunisiy (XX asr boshi)

Bayram At-Tunisiy - XX asrning birinchi yarmida ijod qilgan misrlik shoir.

MUNAJJIM

Derlar, munajjimlar
Dono azaldan.
Bilarmish taqdirni
Ular avvaldan.

Men ishonolmayman,
Dilda alanga -
Bermam munajjimga
Hatto bir tanga!

Dil daftarim titib
Nima qilaman:
O‘zimdan o‘tganni
O‘zim bilaman.

Kuymayman, dilimni
Nurga buraman,
Kelgusi ne bo‘lsa —
O‘zim ko‘raman.

Menga yo‘l ko‘rsatsa,
Aytay oh-vohsiz:
Hammamiz dunyoda
Asli sayyohmiz —

Yurdik uchoq, vagon,
Otda ovvora.
Borar ortib bizni
Ona sayyora.

Agarda rostdan ham
Bilsa munajjim,
Taqdirlarni bayon
Qilsa munajjim,

Zerikardik kutib
O‘limni, ishon:
Ne bo‘lar, kim o‘lar —
Hammasi ayon …

Munajjimlar kezar,
So‘zlayur yolg‘on,
Ularning taqvimi
Shirk erur, inson,

Jilpanglashar tinmay —
Aytgani aldov!
Mayli, bu ishdan ham
Foyda chiqar-ov.

Mana, yurtni bosgan
Mustamlakachi,
Oyog‘i ostidan
Yerimiz qochar.

Bu munajjim uchun
Kerakli yumush!
Qani, do‘stim, ish qil,
Payti keldi, xo‘sh!

Mana shu zolimga
Yuborgin ajal:
Vaboni yuborgin,
O‘latni ham sal,

Qo‘rquvdan oqarib,
Yurtimdan qochib,
Ketib qolsa edi
Mustamlakachi —

Senga rahmat derdi
Bu ona xalqim,
Baraka toparding
Cheksiz, munajjim!

Karim Bahriyev tarjimasi

Saytimiz rivojiga hissa

Uzcard: 8600 5504 8563 9786

© 2004-2020 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.