Oygul Asilbek qizi 1983-yili Zarkent qishlog’ida tug’ilgan. O’zbekiston Milliy Universitetini tamomlagan. She’rlari bir necha bayozlarda nashr etilgan .


* * * 

Tushimmi o’ngimmi eslay olmayman ,
 Faqat yodimdadir seni ko’rganim .

Osmonni to’ldirgan yorug’ nur kabi , 
O’sha senmi yonimda turgan ,
O’sha menmi ming jur’at bilan ,
Qo’llaringdan mahkam ushlagan .

Haqiqat xayolot o’rtasidagi 
Sarhadlar bir muddat buzilib ketdi .
Senu men ikkimiz oramizdagi 
Qismat zanjirlari uzilib ketdi .

Qara ,ko’zlarimga qattiqroq qara ,
Ellarga sovurma oniy lahzani .
Meni yuragingga shunday muxirla ,
Kaftingga chizilgan taqdiring kabi ,

Tushimmi o’ngimmi eslay olmayman ,
Faqat yodimdadir seni ko’rganim


 * * *

 Eshikni ochaman ichkari …
 Qarshimda sukunat boqadi.
 Umrimga mengzagan qumsoat,
 Bildirmay quyiga oqadi.

 Kunlarim to'kilar, tunlarim,
 Yillarni to'ldirib o'ynaydi.
 Afsuski, umrni soatday,
 Teskari ag'darib bo'lmaydi 


 * * *

Qo’ng’iroq chaladi qizg’aldoq bargi ,
Gulkosa labida shabnamning sozi .
Yalpiz yanog’ida yomg’irning gardi ,
Uzoqdan bulbulning kelar ovozi .

Uxlar oftob ufqqa boshini qo’yib ,
Asta qaddin rostlamoqqa urinar .
Hali butun qishloq uyg’onmay turib,
Uch kunlik kelinchak hovli supirar. 


 AROSAT 

 Bir yonimda dunyoning turar hushro’y surati ,
 Bir yonimda namoyon olamning bor kulfati .
 Saodatga savobim bir yonda iqror qilar,  
Bir yonimda gunohim yomon sharmisor qilar .
Bir tomondan jahannam ,do’zax sasi keladi ,
Bir tomondan jannatning xushbuy isi keladi .
Bir yelkamda Rahmonning sano aytgan elchisi ,
Bir yelkamda shaytoning menga qo’ygan soqchisi .
Bir oyog’im rahmatning ko’chasidan o’tadi ,
Bir oyog’im la’natning ko’chasiga tortadi .
Bitta qo’lim beshikni ushlamoqqa chog’langan ,
Bitta qo’lim tobutning dastasiga bog’langan .


SIZDA NIMA BOR 

Siz hayol surmaysiz yomg’irga qarab ,
Bahor keladimi sizga farqi yo’q .
Faqat yashayapsiz bir o’zni ayab ,
Go’yo bu olamning sizga daxli yo’q .

Bilmadim ,azizim sizda nima bor ,
Umrida bir bora kuymagan yurak .
Kechiring ,boshqa hech narsa ko’rmadim ,
Qorong’u, zaxlagan ko’ngildan bo’lak .


SHE’RIYATGA QADAM 

Osmon chayqaladi suvning sozida ,
Quyosh parchalanib ketganday go’yo .
Bu zaminda ayni bahor kezida ,
Tog’larning poyiga qulaydi samo .

 * * *

Ikki olam zavqin birday axtarib ,
Vale ishqdan bo’lak zavqni ko’rmadim .
Dunyo dardlarini bir joyga yig’ib ,
Sevgidan ortiqroq dardni ko’rmadim .

* * *

Qatra ishq so’radim taqdirdan ,
Ko’piga jur’atim etmasdi .
Qo’rqaman bugungi baxtimdan ,
Ko’pikday yorilib ketmasmi .

* * *

Ko’nglimni ulashdim ,to’zimni topdim ,
Hikmat g’aznasidan so’zimni topdim .
Boshimda charx urar taqdiri azal ,
O’zni qurbon qilib, o’zimni topdim .