OʼZ  ЎЗ  РУ  EN

Boris Oleynik (1935)

* * *

Ajab emas, bir kuni
yoring qilsa xiyonat,
Yo pand bersa miltig‘ing.
otilmasdan nogahon.
Xotiraga ishongin,
xotiraga sen faqat,
Xotirani sotgan ko‘p,
u — sotmagan, hech qachon!

Aldash mumkin oynani
qiyshiq garchi basharang,
Gunoh emas o‘limga
chap berib ketsang, hatto.
Faqat yurakka ishon
rayi-ro‘yiga qara,
Yurakni sen aldashing
mumkin, yurak-chi — aslo!

Kulsang, yig‘lasang bo‘lar
Niqob tortib yuzingga,
Kimligingni bilolmas
balki teng-to‘sh, ulfating.
O‘tolmaysan yashirib
o‘zligingni o‘zingdan,
Sen bilan ular doim —
baxting yoki kulfating.

Sim-sim sanchadi yurak,
xotira turar ezib...
Yanglishar undan qochib
qutulmoqchi bo‘lganlar.
Jamiki Magellanlar
jahonni kezib-kezib,
Begona joyda emas,
yurtlarida o‘lganlar!

Ruschadan Muhammad Rahmon tarjimasi.

© 2004-2019 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.