OʼZ  ЎЗ  РУ  EN

Inqirozga uchragan milliarderlar - Forbes 2009

 Butun dunyoga o‘z reytinglari bilan mashhur «Forbes» jurnali AQShning 2008 yildagi inqirozga uchragan milliarderlari ro‘yxatini e'lon qildi. Bunda milliarderlarning bir yil davomida qancha puldan mahrum bo‘lganliklari hisobga olingan. Ro‘yxatning birinchi pog‘onasini kazinolar xo‘jayini Sheldon Adelson egallagan. 2007 yilning sentyabrida AQShning 400 nafar boylari ro‘yxati e'lon qilinganda u 28 milliard dollar egasi edi.

Bir oydan so‘ng uning aktsiyalari narxi yanada qimmatlashdi va bu Adelsonga qo‘shimcha 10 milliard dollar olib keldi. Umuman olganda, u 2006 yilning sentyabridan 2007 yilning sentyabrigacha bo‘lgan vaqt oralig‘ida kuniga 20,5 million dollarga boyib borgan.

Bu moliyaviy inqiroz boshlanguncha bo‘lgan edi. 2008 yildan boshlab uning aktsiyalari narxi 95 foizga tushib ketdi va Adelson naqd 24 milliard dollar zarar ko‘rdi.

Adelsondan keyingi o‘rinni AQShning ikkinchi eng boy odami Uorren Baffet egallagan. O‘tgan yili u aktsiyador bo‘lgan Berkshir-Xatevey kompaniyasining aktsiyalari narxi 28 foizga tushib ketishi oqibatida Uorren 16,5 milliard dollaridan ajradi.

Mashhur Bill Geyts zarar ko‘rganlar ro‘yxatida uchinchi o‘rinni egalladi. «Maykrosoft» aktsiyalari narxining 45 foizga arzonlashishi uning 11 oyda 12,3 milliard dollar zarar ko‘rishiga olib keldi.

Dastlabki beshlikdan shuningdek, investor Kirk Kerkoryan va «Gugl» asoschilaridan biri Larri Peyj joy olishdi. Ularning har biri 11,9 milliard dollaridan ajralishgan. «Gugl» ak­tsiyalari narxi 59 foizga arzonlashgan bo‘lsa, Kerkoryan milliardlarini kazino, neft va avtomobil sano­atida yo‘qotdi. Uning MGM Mirage kompaniyasi ak­tsiyalari o‘tgan bir yil davomida 87 foizga tushib ketgan.

Stiven Shvartsmanning Blackstone Groupdagi 234 million dona aktsiyasining umumiy narxi 11 oy ilgari 5,2 milliard dollarga teng edi. Yil davomida aktsiyalar narxining 72 foizga tushib ketishi uning 3,8 milliard dollardan ajralishiga sabab bo‘ldi.

Fortress Investment Group kompaniyasi asoschilaridan biri Uesli Edens kompaniya aktsiyalarining 89 foizga tushib ketishi oqibatida 1 milliard dollar yo‘qotdi. Hozirda uning aktsiyalari narxi 130 million dollarga baholanmoqda va u yaqin kelajakda milliarderlar ro‘yxatiga kirishi gumon ostida.

Umumiy qilib olganda, ro‘yxatga kiritilgan 25 nafar milliarder 11 oy ichida jami 167 milliard dollar zarar ko‘rishgan, aktsiyalarining narxi esa o‘rtacha 59 foizga tushib ketgan.

Dilshodbek Asqarov tayyorladi

Saytimiz rivojiga hissa

Uzcard: 8600 5504 8563 9786

© 2004-2020 - Ziyo istagan qalblar uchun! Saytda taqdim etilgan elektron manbalardan faqatgina shaxsiy mutolaa maqsadida foydalanish mumkin. Tijoriy maqsadlarda foydalanish (sotish, chop etish, ko‘paytirish, tarqatish) qonunan taqiqlanadi. Saytdan materiallar olib chop etilganda manzilimiz koʻrsatilishi shart.